АНУ-ын Ерөнхийлөгч Дональд Трамп, БНХАУ-ын дарга Ши Жиньпин, ОХУ-ын Ерөнхийлөгч Владимир Путин нар 2026 оны арваннэгдүгээр сарын 19-нд БНХАУ-ын Шэньжэнь хотод болсон Ази, Номхон далайн эдийн засгийн хамтын ажиллагааны (APEC) дээд хэмжээний уулзалтын үеэр гурван талт хэлэлцээ хийлээ.
Уулзалтын гол сэдэв нь цөмийн зэвсгийн хяналт, Украины дайн болон Ираны мөргөлдөөнийг зогсоох асуудал байв.
Трамп уг уулзалтыг дэлхийн энх тайванд бодит ахиц гаргах боломж хэмээн тодорхойлж, АНУ, ОХУ, БНХАУ гурван улс цөмийн зэвсгийн тоог бууруулах, түүнийг ашиглах эрсдэлийг багасгахад онцгой үүрэгтэйг онцолжээ.
Харин Ши Жиньпин дэлхийн энх тайвныг дэмжих чиглэлээр хамтран ажиллах хүсэлтэй байгаагаа илэрхийлсэн бол Путин дэлхийн II дайнд ялалт байгуулсан гурван гүрэн олон улсын энх тайвныг хамгаалах хамтын хариуцлагатай хэмээн мэдэгдсэн байна.
Цөмийн зэвсгийн хэлэлцээрт ахиц гарах уу?
АНУ, ОХУ-ын хооронд байгуулсан цөмийн зэвсгийг хязгаарлах хамгийн сүүлийн томоохон гэрээ болох New START энэ оны хоёрдугаар сард дуусгавар болсон. Трамп уг гэрээг шинэчилж, БНХАУ-ыг оролцуулсан илүү өргөн хүрээний хэлэлцээр байгуулах сонирхолтой байгаагаа илэрхийлжээ.
Гэвч шинжээчдийн үзэж буйгаар нэг удаагийн уулзалтаар цөмийн зэвсгийн асуудлаар томоохон тохиролцоонд хүрэх магадлал бага байна. Учир нь БНХАУ-ын цөмийн зэвсгийн нөөц АНУ, ОХУ-ынхаас харьцангуй бага тул зэвсэглэлээ хязгаарлах хэлэлцээрт нэгдэх сонирхол сул байгаа аж.
Украин хэлэлцээний гадна үлдэх эрсдэлтэй
Гурван улсын удирдагчдын уулзалт олон улсын анхаарлыг татаж байгаа ч Украины дайнтай холбоотой шийдвэрт Украин өөрөө оролцохгүй байх эрсдэл үүсэж буйд Европын зарим улс болгоомжилж байна.
Трамп мөн Путиныг тусдаа хүлээн авч, хоёр тал 40 орчим минутын турш уулзсан юм. Энэ нь өнгөрсөн онд Аляскад уулзсанаас хойших тэдний анхны нүүр тулсан яриа болжээ.
Үүнээс гадна АНУ, БНХАУ-ын худалдааны харилцаа, хөдөө аж ахуйн бүтээгдэхүүний нийлүүлэлт, газрын ховор элементийн экспорт болон хиймэл оюун ухааны технологийн өрсөлдөөн зэрэг асуудал ч уулзалтын хүрээнд хөндөгдсөн байна.
Гэсэн хэдий ч дэлхийн гурван том гүрний удирдагчдын уулзалт бодит тохиролцоонд хүрэх эсэх нь одоогоор тодорхойгүй хэвээр байна.






Сэтгэгдэл 0
Ачаалж байна…